Друк
24.01.2018 Грамадства
Супраць будаўніцтва акумулятарнага заводу пад Берасцем сабрана ўжо 20 000 подпісаў
У мінулыя выходныя подпісы збіраліся на пікетах у дзевяці кропках Берасця.
 
Цэмент і бетон дрэнна цвярдзеюць на марозе і для працы з імі пры нізкіх тэмпературах неабходныя дарагія дадаткі.
 
«Наша мэта сабраць 35 000 подпісаў, калі мы гэта зробім, то згодна з заканадаўствам, улады павінны будуць спыніць будаўніцтва, каб абмеркаваць закрыццё або перанос заводу ў іншае месца», – распавёў Belsat.eu адзін з актывістаў кампаніі супраць будаўніцтва заводу.
 
Збор подпісаў каля гіпермаркету. Людзі прыносяць запоўненыя падпісныя лісты.
Пратэст берасцейцаў супраць небяспечнага заводу працягваецца
Некаторыя ўдзельнікі кампаніі супраць будаўніцтва заводу, якія працуюць на дзяржаўных прадпрыемствах, трапілі пад ціск з боку ўлады. Паводле аднаго са зборшчыкаў подпісаў, кіраўніцтва дзяржаўнай арганізацыі, дзе ён працуе, пагражае не працягнуць з ім кантракт.
 
Да пікетаў, дзе збіраюць подпісы супраць будаўніцтва заводу, выстройваюцца чэргі.
«Гэта толькі пачатак, – кажа адзін з удзельнікаў кампаніі. – Калі нас не пачуюць, мы пяройдзем да больш актыўных дзеянняў».
 
На гэтым тыдні ў інтэрнэце запрацаваў сайт stopzavod.by, які абʼядноўвае тых, хто выступае супраць будаўніцтва заводу. Таксама актывісты працуюць з адвакатамі і не выключаюць, што барацьба супраць будаўніцтва можа перамясціцца ў судовыя кабінеты.
 
 
15 студзеня прайшла сустрэча чыноўнікаў і бізнесменаў з людзьмі, якія выступаюць супраць будоўлі. Яна зацягнулася на чатыры гадзіны, але чыноўнікі так і не змаглі даць уцямныя адказы на пытанні людзей. Пасля сустрэчы завод пачалі будаваць у паскораных тэмпах.
 
 
Каманда Belsat.eu пабывала на будоўлі і пераканалася, што, нягледзячы на мінусавую тэмпературу, працы вядуцца актыўна і вялікай колькасцю рабочых. Імаверна, што гаспадар праекту, Віктар Лемяшэўскі стараецца пабудаваць завод як мага хутчэй.
 
Налепка супраць будаўніцтва заводу на машыне жыхара рэгіёну.
У бліжэйшыя выходныя ў Берасці зноў пройдуць пікеты па зборы подпісаў, а ў населеных пунктах, якія суседнічаюць з будоўляй, адбудуцца сходы грамадзянаў.
 
http://belsat.eu/news/suprats-pabudovy-akumulyatarnaga-zavodu-pad-berastsem-sabrana-uzho-20-000-podpisau/
 
© 2022 "Берасцейская вясна"